Rinah Rakotomanga: Andrasan’ny « brigade criminelle » PDF Imprimer Envoyer
Jeudi, 29 Avril 2010 06:10
Ankoatra ny olana eo aminy sy ny GTT frantsa dia manana raharaha goavana ao amin’ny « brigade criminelle » etsy Anosy koa ny mpanolotsain’ny ambasady malagasy miasa atsy Parisy, Rinah Rakotomanga. Vono sy fandratràna niniana natao (Art 309 ao amin’ny CP), fidirana an-keriny tany an-tranon’olona (Art 184 alinéa 2 ao amin’ny CP), fandrahonana ho faty (Art 307 ao amin’ny CP) no heloka hanenjehina an’ity masoivoho ity amin’izany.
Raharahan-tokantrano no niandohan’ny olana. Nisakaiza tamina tomponandraikitra iray (efa manam-bady) tamin’ny andron’ny amiraly Didier Ratsiraka i Rinah Rakotomanga. Samy nialokaloka tany Frantsa izy ireo taorian’ny krizy 2002 kanefa kosa mbola nitohy ny fiarahana. Nody teto an-tanindrazana ilay lehilahy taty aoriana ary nanapa-kevitra ny tsy hiaraka aminy intsony. Tonga tao amin’ny biraon’ilay raim-pianakaviana i Rinah Rakotomanga, ny faha-4 marsa 2010 ary dia nifamaly tao izy roa. Tamin’izay fotoana izay koa anefa no nahatongavan’ny tompom-bady. Namonjy ny vadiny tao anatin’ilay fiarakodia Mercedes 4x4 avy hatrany ilay rangahy ka niteny tamin’ity farany mba hamelona haingana izany fiara izany hiala teo amin’ny toerana. Nenjehin’i Rinah Rakotomanga avy aoriana tamin’ny fiarakodia Megane izy mivady, tahaka ireny horonantsarimihetsika any Hollywood ireny.
Nosongonan’ity mpanolotsain’ny ambasady ity izy ireo ary dia nobahanany ny arabe. Afaka nandingana ny “trottoir” kosa anefa ilay 4x4 ka dia nitohy ihany ny fandosirana. Niantso ny « gardien » tany an-tranony izy mivady mba hamaha avy hatrany ny vavahady. Tafiditra soa amantsara tao an-tokontaniny ihany anefa izy ireo. Roa minitra taty aoriana, indro nisy fiarakodia nitrongy ny vavahady niditra an-keriny tao an-tanàna. Nifanandrify indrindra tamin’ny fotoana nivoahan’izy mivady ny fiarany izany fotoana izany. Teo no nanomboka ny gidragidra.
Novonoin’i Rinah Rakotomanga tamin’ny daka sy ny totohondry ilay ramatoa. Naratra mafy tokoa ity farany vokatr’izany ary dia voatery nafenina tany an-trano. Mbola nijanona nitabataba tao nandritra ny roa ora ihany anefa ity mpanolotsainan’ny ambasady ity vao tapa-kevitra niala namonjy fodiana. Nentina tany amin’ny dokotera kosa ilay naratra ary nahazo « Incapacité de Ttravail Temporaire” 22 andro.
Nametraka fitoriana teny anivon’ny fampanoavana, araka ny “Soit Transmis” laharana 3670 ny vadin’ilay rangahy sakaizan’i Rinah Rakotomanga teo aloha, izay nanome fahefana ny “brigade criminelle” hiantoka ny fanadihadiana mikasika izao heloka izao. Miandry an’ity mpanolotsainan’ny ambasadin’’i Madagasikara any Frantsa ity araka izany ry zareo etsy amin’ny B.C. Efa lasa nody namonjy ny biraony any Parisy moa ny voampanga, izay nivahiny teto an-tanindrazana nandritra ireny fotoanan’ny « Teny ifampierana » natao teny Ivato ireny.
